पुरानो करारचाहिँ येशूज्यू आउनुभन्दा लामो समयअघि लेखिएको भए पनि यसमा येशूज्यूले गर्नुहुने कार्यको विषयमा ठीकसँग अगमवाणी गरिएको छ । यसकारण येशूज्यूले “बाइबलले मेरो विषयमा गवाही दिएको छ” भन्नुभयो (यूह ५:३९) र पुनरुत्थानपछि उहाँले पुरानो करारको अगमवाणीद्वारा आफ्नो विषयमा गवाही दिनुभयो (लूक २४:२५; ४४-४५) । मानिसहरूलाई आकर्षित गर्ने त्यस्तो केही सुन्दरता नभएको स्वरूपमा उहाँ प्रकट हुनुभए तापनि प्रेरितहरू र सुरुको मण्डलीका सन्तहरूले बाइबलको अगमवाणी हेरेर उहाँलाई ख्रीष्टको रूपमा ग्रहण गरे । यो पृथ्वीमा आउनुभएका मुक्तिदातालाई चिन्न सकिने स्पष्ट प्रमाण, अनि येशूज्यूसम्बन्धी पुरानो करारको अगमवाणी र त्यसको पूर्णताबारे अध्ययन गरौं ।
येशूज्यूको जन्म सम्बन्धी अगमवाणी
येशूज्यूका बुबा-आमा योसेफ र मरियम गालील क्षेत्रको नासरत भन्ने ठाउँमा बस्दथे (लूक २:४-५) । तर तिनीहरू दक्षिणको धेरै टाढा यहूदियाको बेथलेहेममा गए र त्यहाँ येशूज्यूको जन्म भयो । यसरी तिनीहरूलाई नै थाहा नभएको घडीमा बाइबलको एउटा अगमवाणी पूरा भयो ।
“तर ए बेथलेहेम एप्राता, तँ यहूदाका कुलहरूमध्ये सानो भए तापनि तँबाट मेरो निम्ति एक जना निस्कनुहुनेछ, जो इस्राएलका शासक हुनुहुनेछ, जसको सुरु पुरानो समयदेखि, अर्थात् प्राचीनकालदेखि नै छ ।” मीका ५:२
मीकाको पुस्तकचाहिँ येशूज्यू आउनुभन्दा करीब ७०० वर्षअघि लेखिएको थियो । यहाँ इस्राएलका शासक जसको सुरु पुरानो समयदेखि छ, उहाँ बेथलेहेमबाट आउनुहुनेछ भनिएको छ । मूलभूत रूपमा परमेश्वर हुनुभएका येशूज्यू बेथलेहेममा जन्मनुभएर यो अगमवाणी पूरा गर्नुभयो ।
हेरोद राजाको समयमा यहूदियाको बेथलेहेममा जब येशूको जन्म भयो, … मत्ती २:१-६
येशूज्यू जन्मनुहुँदा इस्राएल देश रोमको अधीनमा थियो । कैसर अगस्टसले रोमी साम्राज्यमा जनगणना लिनू भन्ने हुकुम जारी गरे । सम्राटको आदेशका कारण दाऊदको वंशका योसेफ, दाऊदको गृहनगर यहूदियाको बेथलेहेममा जानुपऱ्यो । योसेफ र तिनकी पत्नी मरियमले १०० किलोमिटरको लामो यात्रा पार गरे र अन्त्यमा मरियमले येशूज्यूलाई जन्म दिइन् ।
ती दिनमा कैसर अगस्टसले तिनको सारा साम्राज्यमा जनगणना लिनू भन्ने हुकुम जारी गरे । … योसेफ पनि गालीलको नासरतबाट यहूदियाको बेथलेहेम भन्ने दाऊदको सहरमा गए, किनभने तिनी दाऊदका कुटुम्ब र वंशका थिए । नाउँ दर्ता गराउन तिनी आफूसँग मगनी भएकी मरियमलाई साथमा लिएर गए । मरियम गर्भवती थिइन् । तिनीहरू त्यहाँ भएकै बेला मरियमको बालक जन्माउने बेला आयो । तिनले आफ्नो जेठो छोरो जन्माइन् र उहाँलाई लुगाले बेह्रेर डूँडमा राखिन्, किनकि तिनीहरूका निम्ति पौवामा ठाउँ थिएन । लूक २:१-७
आफू जन्मने ठाउँ आफैले छनोट गर्न सक्ने मानिस संसारमा कोही छैन । तर अगमवाणीअनुसार येशूज्यू बेथलेहेममा जन्मनुभयो । रोमी सम्राटले हुकुम जारी गर्नु र योसेफ आफ्नी गर्भवती पत्नीलाई आफूसँगै बेथलेहेम लिएर जानु कुनै संयोग थिएन । योचाहिँ बाइबलको अगमवाणी पूरा गर्नुहुने परमेश्वरको कार्य थियो ।
येशूज्यूको सेवा-कार्य सम्बन्धी अगमवाणी
येशूज्यूको समयभन्दा करीब ७०० वर्षअघि लेखिएको यशैयाको पुस्तकमा उहाँको विषयमा अगमवाणी गरिएको थियो ।
कसैले बोलाइरहेको एउटा आवाज सुनिन्छ: “मरुभूमिमा परमप्रभुको निम्ति बाटो तयार गर । उजाड-स्थानमा हाम्रा परमेश्वरको निम्ति मूलबाटो समतल बनाऊ । … हेर, परमप्रभु परमेश्वर पराक्रमसाथ आउँदैहुनुहुन्छ, … उहाँले आफ्नो बगाललाई गोठालाले झैँ चराउनुहुन्छ । उहाँले थुमाहरूलाई आफ्नै अँगालोमा लिनुहुन्छ, र तिनीहरूलाई आफ्नै हृदयको नजिक बोक्नुहुन्छ । उहाँले ससाना बच्चा भएकालाई चाहिँ बिस्तार-बिस्तार डोऱ्याउनुहुन्छ ।” यशै ४०:३, ९-११
“मरुभूमिमा परमप्रभुको निम्ति बाटो तयार गर” भन्ने वचनचाहिँ “परमेश्वर यो पृथ्वीमा आउनुअघि उहाँको निम्ति बाटो तयार गर” भन्ने अर्थ हो । साथै परमेश्वरको बाटो तयार भएपछि परमेश्वर स्वयम् गोठालोको रूपमा आउनुहुनेछ भनेर अगमवाणी गरिएको छ । यो अगमवाणी बप्तिस्मा-दिने यूहन्ना र येशूज्यूद्वारा पूरा भयो ।
त्यही समय बप्तिस्मा-दिने यूहन्ना यहूदियाको उजाड-स्थानमा आए, र यसो भन्दै प्रचार गर्न लागे, “पश्चात्ताप गर, किनभने स्वर्गको राज्य नजिक आएको छ ।” किनभने यी तिनै हुन्, जसको विषयमा यशैया अगमवक्ताद्वारा यसो भनिएको थियो: “उजाड-स्थानमा एक जना कराउनेको आवाज, ‘परमप्रभुको मार्ग तयार पार, उहाँका पथ सोझा बनाओ’ ।” मत्ती ३:१-३
बप्तिस्मा-दिने यूहन्नाले उजाड-स्थानमा येशूज्यूको निम्ति मार्ग तयार गरेका कुरा संयोग थिएन तर बाइबलको अगमवाणीअनुसार पूरा भएको कार्य थियो । यशैया अध्याय ९मा पनि येशूज्यूको बारेमा अगमवाणी गरिएको छ ।
तापनि सङ्कष्ट परेकाहरूका निम्ति नैराश्य हुनेछैन । पहिले त उहाँले जबूलूनको देश र नप्तालीको देशलाई नम्र तुल्याउनुभयो, तर भविष्यमा उहाँले यर्दनका किनारको समुद्र नजिकैको अन्यजातिहरूको गालीललाई सम्मानित तुल्याउनुहुनेछ । अन्धकारमा हिँड्ने मानिसहरूले एउटा ठूलो ज्योति देखेका छन् । मृत्युको छायाको देशमा बस्नेहरूमाथि एउटा ज्योति उदाएको छ । यशै ९:१-२
जबूलून र नप्ताली दुवै गालीलको क्षेत्रमा पर्छ । इस्राएलको उत्तरी भागमा अवस्थित गालीलचाहिँ प्रायः अन्यजातिहरूको आक्रमणमा परेको र सांस्कृतिक रूपमा अन्यजातिहरूबाट धेरै ग्रस्त भएको क्षेत्र थियो । अन्यजातिहरूले अन्य देवताहरूको पूजा गर्ने र अशुद्ध भोजन खाने भएकाले इस्राएलीहरूले तिनीहरूलाई अशुद्ध ठानी घृणा गर्थे । यस्तो अवस्थामा गालील जस्तो ठाउँमा परमेश्वरको महान् कार्य हुन सक्छ भन्ने कुरा सोच्न पनि गाह्रो थियो ।
तर परमेश्वरले गालीलमा ठूलो ज्योति चम्काउनुहुनेछ भन्नुभयो । येशूज्यूले गालीलमा सुसमाचारको ज्योति चम्काउनुभएर यो अगमवाणी पूरा गर्नुभयो ।
यूहन्ना थुनामा परे भन्ने सुनेर येशू गालीलतिर लाग्नुभयो, र नासरत छोड़ेर कफर्नहुममा गई त्यहाँ वास गर्न लाग्नुभयो । यो सहर जबूलून र नप्तालीका क्षेत्रमा, समुद्रको किनारमा पर्छ । यशैया अगमवक्ताले भनेको वचन यसरी पूरा भयो: … त्यस बेलादेखि प्रचार गर्दै येशूले भन्न लाग्नुभयो, “पश्चात्ताप गर, किनभने स्वर्गको राज्य नजिक आइपुगेको छ ।” … अनि येशू तिनीहरूका सभाघरहरूमा सिकाउँदै, राज्यको सुसमाचार प्रचार गर्दै, र मानिसहरूमा भएका हरेक किसिमका रोग र शारीरिक दुर्बलता निको पार्दै सारा गालीलभरि घुम्नुभयो । मत्ती ४:१२-१७, २३
मृत्युको पीडामा चिच्याइरहेका मानिसहरूलाई अनन्त जीवन दिन येशूज्यू यो पृथ्वीमा आउनुभयो (यूह १०:१०), र यसैको लागि उहाँले राज्यको सुसमाचार प्रचार गर्नुभयो । यसरी येशूज्यूले गालीलमा सुसमाचारद्वारा जीवनको ज्योति चम्काउनुभएर यशैया अध्याय ९को अगमवाणी पूर्ण रूपमा पूरा गर्नुभयो । जकरियाको पुस्तकमा पनि येशूज्यूले ५०० वर्षपछि गर्नुहुने कार्यको विषयमा अगमवाणी गरिएको छ ।
हे सियोनकी छोरी, खूब रमाऊ । हे यरूशलेमकी छोरी, जोडसित कराऊ ! हेर, तिम्रा राजा तिमीकहाँ आउँदैहुनुहुन्छ । उहाँ धर्मात्मा र मुक्तिदाता हुनुहुन्छ । उहाँ भला हुनुहुन्छ, र गधामाथि, अर्थात् गधाको बच्चा एउटा बछेडामाथि सवार भएर आउँदैहुनुहुन्छ । जक ९:९
सियोनका राजा गधामा सवार हुनुहुनेछ भन्ने अगमवाणी, सियोनका राजा हुनुभएका येशूज्यू यरूशलेममा प्रवेश गर्नुभए पछि पूरा गर्नुभयो ।
भोलिपल्ट चाडमा आउने ठूलो भीडले येशू यरूशलेममा आउँदैहुनुहुन्छ भन्ने सुन्यो, र मानिसहरू खजूरका हाँगाहरू लिएर उहाँलाई स्वागत गर्न कराउँदै निस्के, “होसन्ना ! धन्य परमप्रभुको नाउँमा आउने इस्राएलका राजा !” अनि गधाको एउटा बछेडो भेट्टाएर येशू त्यसमाथि चढ्नुभयो, जस्तो लेखिएको छ, “सियोनकी छोरी, नडराऊ । हेर, तिम्रा राजा गधाको बछेडामाथि सवार भएर आउँदैहुनुहुन्छ ।” यी कुराहरू उहाँका चेलाहरूले पहिले बुझेनन् । तर येशूको महिमा भएपछि यी कुरा उहाँको विषयमा लेखिएका थिए, र यी काम उहाँको निम्ति तिनीहरूले गरेका हुन् भन्ने तिनीहरूले सम्झे ।यूह १२:१२-१६
यी अगमवाणीहरूबाहेक, मुक्तिदाताको रूपमा आउनुहुने येशूज्यूको बारेमा पुरानो करारमा अन्य थुप्रै अगमवाणीहरू छन् ।
“तिनीहरूका निम्ति तिनीहरूका दाजुभाइमध्येबाट तँजस्तै म एक जना अगमवक्ता खडा गर्नेछु । म मेरो वचन तिनको मुखमा हालिदिनेछु, र मैले आज्ञा गरेका सबै कुरा तिनले तिनीहरूलाई भन्नेछन् …” व्य १८:१८-१९
परमप्रभुले शपथ खानुभएको छ, र आफ्नो मन बदल्नुहुनेछैन, “मल्कीसेदेकको दर्जाबमोजिम तिमी सधैँभरिको निम्ति पूजाहारी हौ ।” भज ११०:४
योचाहिँ मोशाजस्तै अगमवक्ता र मल्कीसेदेकको दर्जाअनुसारका पूजाहारी भविष्यमा देखा पर्नुहुने कुराको अगमवाणी हो । यसअनुसार मोशाले जस्तै येशूज्यूले पनि निस्तार-चाडद्वारा मानव-जातिलाई पापको दासत्वबाट छुटकारा गराउनुभयो । अनि मल्कीसेदेकले जस्तै उहाँले निस्तार-चाडको रोटी र दाखमद्यद्वारा पाप-क्षमा र अनन्त जीवनको आशिष् दिनुभयो । यसकारण प्रेरितहरूले येशूज्यू नै बाइबलको अगमवाणी पूरा गर्नुभएका ख्रीष्ट हुनुहुन्छ भनी गवाही दिए (प्रे ३:२२-२४; हिब्रू ५:८-१०) ।
येशूज्यूको कष्ट सम्बन्धी अगमवाणी
यशैया अगमवक्ताले ख्रीष्टको कष्ट सम्बन्धी अगमवाणी गरे ।
… ऊ मानिसहरूबाट घृणित थियो र इन्कार गरियो, … तर ऊ त हाम्रा अपराधहरूका निम्ति छेडियो । … र उसका कोर्राको चोटले हामी निको भयौं । … यशै ५३:१-६
यो अगमवाणीअनुसार येशूज्यू मानव-जातिको पापको खातिर घृणित हुनुभयो, कीला र भालाले छेडिनुभयो र कोर्रा खानुभयो ।
तब तिनले तिनीहरूका निम्ति बारब्बालाई छोडिदिए, तर येशूलाई कोर्रा लगाएर क्रूसमा टाँगिनलाई सुम्पिदिए … तिनीहरूले उहाँको वस्त्र फुकालेर उहाँलाई लाल वस्त्र लगाइदिए । तिनीहरूले काँढाको मुकुट गाँथेर उहाँको शिरमा लगाइदिए, र उहाँको दाहिने हातमा निगालो दिए, र उहाँको सामु घुँडा टेकेर उहाँलाई यसो भन्दै उहाँको गिल्ला गरे, “हे यहूदीहरूका राजा, प्रणाम ।” तब तिनीहरूले उहाँलाई थुके, र त्यो निगालो लिएर उहाँको शिरमा हिर्काए । मत्ती २७:२६-३०
तर सिपाहीहरूमध्ये एक जनाले उहाँको कोखामा भालाले घोच्यो, र तुरुन्तै रगत र पानी निस्क्यो । यूह १९:३४
बाइबलमा येशूज्यूले क्रूसमा मृत्यु भोग्नुभएपछि हुने कुराको विषयमा पनि अगमवाणी गरिएको छ र यो अगमवाणी पनि जस्ताको तस्तै पूरा भयो ।
उसको चिहान दुष्टहरूसित बनाइयो, र मृत्युमा धनीहरू उसको साथमा थिए, … यशै ५३:९
उसको चिहान दुष्टहरूसित बनाइयो भन्ने अगमवाणीअनुसार येशूज्यू क्रूसमा टाँगिनुहुँदा उहाँको दायाँ र बायाँपट्टि दुई जना डाँकूहरू अर्थात् दुष्टहरू टाँगिएका थिए । अनि मृत्युमा धनीहरू उसको साथमा हुनेछन् भन्ने अगमवाणीअनुसार येशूज्यूको शरीरलाई अरिमाथियाको धनी मानिस योसेफको चिहानमा राखियो ।
उहाँसँग दुई जना डाँकूहरू क्रूसमा झुण्ड्याइएका थिए, एउटा उहाँको दाहिनेपट्टि र अर्को देब्रेपट्टि । मत्ती २७:३८
साँझ परेपछि अरिमाथियाका योसेफ नाउँ भएका एक जना धनी मानिस आए । तिनी स्वयम् येशूका चेला थिए । तिनले पिलातसकहाँ गएर येशूको मृत शरीर मागे, … योसेफले मृत शरीर लिएर सफा मलमलको कपडाले बेह्रे, र तिनले चट्टानमा खोपेर बनाएका आफ्नै नयाँ चिहानमा त्यो राखे, र चिहानको मुखमा एउटा ठूलो ढुङ्गा गुडाइदिए, र तिनी गए । मत्ती २७:५७-६०
परमेश्वरले भविष्यमा आउनुहुने ख्रीष्टको बारेमा बाइबलमा विस्तृत रूपले अगमवाणी गर्नुको कारणचाहिँ, जसले सबै अगमवाणी पूरा गर्नुहुन्छ, उहाँ नै ख्रीष्ट हुनुहुन्छ भन्ने कुरा मानिसहरूलाई विश्वास दिलाउनको निम्ति हो । यो पृथ्वीमा जन्मेका असंख्य मानिसहरूमध्ये, हामीले येशूज्यू नै ख्रीष्ट अर्थात् मुक्तिदाता हुनुहुन्छ भनेर विश्वास गर्न सक्नुको कारणचाहिँ, येशूज्यूले बाइबलका सबै अगमवाणीहरू पूरा गर्नुभएकोले गर्दा हो ।
मुक्तिदातासम्बन्धी बाइबलका अगमवाणीहरूको पूर्णताचाहिँ २,००० वर्षअघि मात्र सीमित रहेन । बाइबलमा येशूज्यू दोस्रो पल्ट आउनुहुने कुरा अगमवाणी गरिएको छ (हिब्रू ९:२८) । येशूज्यूले दोस्रो आगमनमा पूरा गर्नुपर्ने त्यस्ता थुप्रै अगमवाणीहरू नयाँ करार र पुरानो करार बाइबलमा जताततै छन् । यी अगमवाणीहरू र तिनको पूर्णताबारे लगनशीलताका साथ अध्ययन गरेमा हामीले दोस्रो आगमनका येशूज्यूलाई ग्रहण गर्न सक्नेछौं ।