बाइबलमा नोआको जहाज र जलप्रलयको बारेमा उत्पत्ति अध्याय ६-८मा स्पष्टसँग भनिएको छ । अभूतपूर्व जलप्रलयद्वारा संसार नष्ट हुनुअघि नोआले परमेश्वरको आदेशअनुसार विशाल जहाज बनाएर आफ्नो परिवार र सबै जातका जीवित प्राणीहरूलाई शरण दिएर बचाए । परमेश्वरले पृथ्वीलाई अन्तिम इन्साफ गर्नुहुने अन्त्यको दिन पनि नोआको समयजस्तै हुनेछ भनेर बाइबलमा अगमवाणी गरिएको छ । यसैकारण हामीले नोआको समयको इतिहासलाई याद गर्नुपर्छ ।
नोआलाई जहाज बनाउन आज्ञा गर्नुभएका परमेश्वर
आदम र हव्वा अदनको बगैँचाबाट धपाइएपछि, पृथ्वीमा मानिसहरूको संख्या बढ्दैगयो । जनसंख्या जति बढ्यो, संसार त्यति नै भ्रष्ट र पापी हुँदैगयो । परमेश्वरले सबै मानिसहरूको हृदय भ्रष्ट भएको देख्नुभएकोले उहाँले संसारलाई नष्ट गर्ने अठोट गर्नुभयो ।
त्यो समयमा आदमका १०औँ पुस्ता, नोआचाहिँ परमेश्वरको साथसाथ हिँडने एकमात्र धर्मी मानिस थिए (उत ६:९) । भ्रष्टताले भरिएको संसारलाई जलप्रलयद्वारा नष्ट गर्ने कुरा, अनि त्यसबाट बच्ने तरिका परमेश्वरले नोआलाई जानकारी दिनुभयो । परमेश्वरले तिनलाई गोपेर काठको जहाज बनाउन आज्ञा गर्नुभई त्यसको लागि विशेष नाप र निर्देशन पनि जानकारी दिनुभयो । परमेश्वरको वचनअनुसार नोआले जहाज निर्माण कार्य सम्पन्न गरे । त्यो ३०० हात (४५० फिट) लामो, ५० हात (७५ फिट) चौडा र ३० हात (४५ फिट) अग्लो विशाल जहाज थियो ।
नोआको समयमा जलप्रलय र मुक्तिको कार्य
नोआले जहाज बनाइसकेपछि परमेश्वरले अबको ७ दिनमा पृथ्वीमा ४० दिन ४० रात पानी पर्नेछ र पृथ्वीमा भएका सबै थोकहरू नष्ट हुनेछन् भन्नुभयो । परमेश्वरले नोआलाई, तिनका परिवार र सबै जातका जीवजन्तुहरूलाई जहाजमा ल्याउन आज्ञा गर्नुभयो । परमेश्वरको आज्ञाबमोजिम नोआले सबै गरेपछि परमेश्वरले जहाजको सबै ढोका बन्द गरिदिनुभयो (उत ७:१-९, १३-१६), र त्यसको ७ दिनपछि पृथ्वीमा पानी पर्न थाल्यो ।
योचाहिँ नोआको जीवनको ६००औँ वर्षको दोस्रो महिनाको १७औँ दिनमा घटेको घटना थियो । ४० दिनसम्म नरोकिईकन पानी पऱ्यो र सारा पृथ्वी जलप्रलयले डुबानमा पऱ्यो । चराचुरुङ्गी, पाल्तु पशुहरू, वन्य जन्तुहरू, मानिसहरू आदि नाकमा सास हुने सबै प्राणीहरू नाश भए । केवल परमेश्वरको वचनमा आज्ञाकारी भएका नोआ, तिनका ७ जना परिवारजन र जहाजमा ल्याइएका जीवजन्तुहरू मात्र बाँचे ।
सातौँ महिनाको १७औँ दिनमा जहाज आरारातको पहाडमा अडियो । करीब साढे २ महिना बितेपछि दशौँ महिनाको पहिलो दिनमा हिमशिखर देखिन थाल्यो । ४० दिनपछि नोआले एउटा कागलाई जमिन हेर्न पठाए, र सात दिनपछि तिनले ढुकुरलाई पनि उडाइदिए । ढुकुरले आफ्नो चुच्चोमा भद्राक्षको पात लिएर फर्केपछि तिनले पृथ्वीमा पानी घटेछ भन्ने कुरा थाहा पाए । ७ दिनपछि ढुकुरलाई फेरि बाहिर पठाउँदा ढुकुर फर्किएन ।
अर्को वर्षको पहिलो महिनाको पहिलो दिनमा नोआले जहाजको छत उघारेर बाहिरको अवस्था जाँचबुझ गरे । जमिन सुक्खा थियो । दोस्रो महिनाको २७औँ दिनमा जमिन पूर्ण रूपले सुक्खा भएपछि नोआ आफ्नो परिवार तथा जीवजन्तुहरूसहित जहाजबाट बाहिर निस्किए । तिनीहरू जहाजभित्र एक वर्षभन्दा बढी समय बसेका थिए ।
अनि नोआले परमप्रभुको निम्ति एउटा वेदी बनाएर हरेक शुद्ध पशु र शुद्ध पक्षीमध्येबाट केही लिई होमबलि चढाए । नोआले अर्पण गरेका बलिदानबाट प्रसन्न हुनुभएर परमेश्वरले तिनी र तिनका छोराहरूलाई धेरे सन्तानहरू फल्दै-फुल्दै वृद्धि हुने आशिष् दिनुभयो । जलप्रलयअघिसम्म तिनीहरूले फलफूल र सागपात मात्र खान सक्थे तर जलप्रलयपछि चाहिँ सबै जीवित-जीवात भोजनको रूपमा दिइयो । परमेश्वरले फेरि कहिल्यै जीवित प्राणीहरूलाई जलप्रलयद्वारा नष्ट नगर्ने कुरा बताउनुहुँदै, त्यो कुराको प्रतिज्ञाको चिन्हस्वरूप नोआ र तिनका छोराहरूलाई आकाशमा इन्द्रेनी देखाउनुभयो ।
अन्तिम इन्साफ र मुक्तिको जहाज, ‘सियोन’
नोआको समयको जलप्रलयको घटनाचाहिँ, परमेश्वरले मानव इतिहासप्रति गहिरो चासो राख्नुहुन्छ भन्ने कुराको प्रमाण हुनुको साथै योचाहिँ मानव-जातिको लागि मुक्तिको सन्देश पनि हो ।
पृथ्वीमा हुने अन्तिम इन्साफबारे बाइबलका धेरै पदहरूमा चेताउनी दिइएको छ । येशूज्यूले संसारको अन्त्यसम्बन्धी अगमवाणी गर्नुहुँदा “मानिसको पुत्रको आगमन नोआको दिनहरूजस्तै हुनेछ” भन्नुभयो (मत्ती २४:३७-३९; लूक १७:२६-२७) । प्रेरित पत्रुसले हामीलाई, नोआको समयको जलप्रलय याद गराउँदै इन्साफको दिनको विषयमा लेखे (२ पत्र ३:३-१३) । नोआको समयमा घटेको घटनाचाहिँ अन्तिम समयमा हुने कुराको अगमवाणी हो ।
परमेश्वरको वचनमा आज्ञाकारी हुँदै नोआले जहाज बनाएकाले मुक्ति पाउन सके । यसले, परमेश्वरको वचन पालन गर्नेहरूले मात्र अन्तिम इन्साफअघि आत्मिक जहाजमा प्रवेश गरेर मुक्ति पाउन सक्नेछन् भन्ने कुरा देखाउँछ । विपत्ति आउनुअघि हामीहरू मुक्तिको जहाज सियोनमा जानुपर्छ भनेर बाइबलले बताएको छ ।
“ … सियोनतिर जान झन्डा उठाओ, ढीला नगरी सुरक्षाको निम्ति भागेर जाओ ! किनकि म उत्तरदेखि विपत्ति र ठूलो सर्वनाश ल्याइरहेछु ।” यर ४:५-६
नोआको जहाजमा सबै किसिमका जीवजन्तुहरू गएजस्तै, पछिल्ला दिनहरूमा पनि धेरै जाति-जातिहरू सियोनमा आउनेछन् भनेर बाइबलमा अगमवाणी गरिएको छ ।
पछिल्ला दिनहरूमा परमप्रभुका मन्दिरको पहाडचाहिँ पहाडहरूमा प्रमुखझैँ स्थापित हुनेछ, र त्यो सबै डाँडाहरूभन्दा माथि उठाइनेछ, र मानिसहरू त्यहाँ ओइरिएर जानेछन् । धेरै जाति-जातिहरू आएर भन्नेछन्, “आओ, हामीहरू परमप्रभुको पर्वत, याकूबका परमेश्वरको भवनमा जाऔं । उहाँले हामीलाई आफ्नो मार्ग सिकाउनुहुनेछ, ताकि हामी उहाँको मार्गमा हिँड्न सकौं ।” व्यवस्था सियोनबाट र परमप्रभुको वचन यरूशलेमबाट निस्कनेछन् । मीका ४:१-२
त्यसोभए सियोनले खासमा कुन ठाउँलाई जनाउँछ होला ? यशैया अगमवक्ताले सियोनचाहिँ परमेश्वरको चाड मनाइने ठाउँ हो भनेर अगमवाणी गरेका छन् ।
हाम्रा ठहराइएका चाडहरूको सहर सियोनलाई हेर, … किनभने परमप्रभु हाम्रा न्यायाधीश हुनुहुन्छ । परमप्रभु हामीलाई व्यवस्था दिने हुनुहुन्छ । परमप्रभु हाम्रा राजा हुनुहुन्छ । उहाँले नै हामीलाई बचाउनुहुनेछ । … त्यहाँ बस्ने मानिसहरूका पाप क्षमा गरिनेछन् । यशै ३३:२०-२४
वर्तमान समयमा परमेश्वरको नयाँ करारका चाडहरू पूर्ण रूपमा मान्ने मण्डलीचाहिँ परमेश्वरको मण्डली विश्व सुसमाचार समाज मात्र हो । मीकाको पुस्तकमा अगमवाणी गरिएजस्तै, सारा संसारका जाति-जातिहरू नयाँ करारको सत्यता सिक्न परमेश्वरको मण्डलीमा ओइरिएर आइरहेका छन् । यसकारण मानव-जातिले अन्तिम विपत्तिबाट मुक्ति पाउनलाई जान्नैपर्ने मुक्तिको शरणस्थान नै परमेश्वरको मण्डली, सियोन हो ।
हिब्रूको पुस्तकमा, नोआको समयको जलप्रलयको विषयमा यस्तो लेखिएको छ : “विश्वासद्वारा नोआले त्यति बेलासम्म अदेख रहेका घटनाका बारेमा परमेश्वरबाट चेताउनी पाएर भक्तिसाथ आफ्नो घरानालाई बचाउन एउटा जहाज बनाए (हिब्रू ११:७) ।” यस युगमा पनि परमेश्वरको भय मान्ने र विश्वासद्वारा सियोनमा रहने मानिसहरू बचाइनेछन् ।